རི་དྭགས་ཆོས་འཁོར་ནི། དགོན་པའི་ཚོམས་ཆེན་གྱི་ཡང་སྟེང་ངམ་སྒོ་འཁྱོལ་གྱི་སྟེ་དུ་རི་དྭགས་ཕོ་མོ་གཉིས་ འཁོར་ལོ་རྩིབས་བརྒྱད་ལྡན་ཞིག་ལ་རྩེ་གཅིག་ཏུ་བལྟས་ནས་ཡོད་པ་ཞིག་བཞེངས་སྲོལ་ཡོད། དེ་དག་གིས་མཚོན་དོན་ནི། དཔེ་དོན་གཉིས་ཀྱི་སྒོ་ནས་བཤད་ན།
སྔོན་བཅོམ་ལྡན་འདས་དྲང་སྲོང་ལྷུང་བའི་རི་དྭགས་ཀྱི་ནགས་སུ་མི་སྨྲ་བའི་བརྟུལ་ཞུགས་སུ་བཞུགས་པའི་ཚེ། ལྷ་ཡི་དབང་པོ་ཚངས་པ་ཆེན་པོས་གསེར་གྱི་འཁོར་ལོ་རྩིབས་སྟོང་དང་ལྡན་པ་ཕུལ་ཏེ་ཆོས་ཀྱི་འཁོར་ལོ་བསྐོར་བར་བསྐུལ་བའི་གསོལ་བ་བཏབ་པའི་ཚེ། ནགས་ན་གནས་པའི་རི་དྭགས་ཀྲིཥྞ་སཱར་ཕོ་མོ་གཉིས་བྱུང་སྟེ་དགའ་མགུ་ཡིད་རང་གི་རྣམ་པས་མིག་མི་འཛུམ་པར་ཆོས་ཀྱི་འཁོར་ལོར་བལྟ་བར་ལོ་རྒྱུས་ཡོད་པ་བཞིན། དེ་ནས་བཟུང་ནང་པའི་མཚོན་རྟགས་རི་དྭགས་ཆོས་འཁོར་ཞེས་པ་དེ་བྱུང་བ་ཡིན། འཁོར་རྩིབས་བརྒྱད་ནི་སངས་རྒྱས་ཀྱིས་ཆོས་ཀྱི་འཁོར་ལོ་བསྐོར་བ་མཚོན། དེའི་གཡས་གཡོན་དུ་རི་དྭགས་ཕོ་མོ་གཉིས་ནི། སངས་རྒྱས་ཀྱི་དམ་པའི་ཆོས་ཀྱི་འཁོར་ལོ་བསྐོར་བ་ལ་དེ་དག་ལོངས་སུ་སྤྱོད་མཁན་གྱི་གདུལ་བྱ་རྣམས་ཀྱིས་ཆོས་ལ་དགའ་དད་སྤྲོ་གསུམ་གྱི་སྒོ་ནས་རྩེ་གཅིག་ཏུ་ཉན་པ་མཚོན། དེ་ཡང་མདོ་ལས། ལེགས་པར་རབ་ཏུ་ཉོན་ལ་ཡིད་ལ་ཟུངས་ཤིག །ཅེས་གསུངས་པ་ལྟར། འགལ་རྐྱེན་སྣོད་ཀྱི་སྐྱོན་གསུམ་སྤངས་ལ། མཐུན་རྐྱེན་འདུ་ཤེས་དྲུག་བསྟེན་པའི་སྒོ་ནས་ཉན་དགོས་པར་མཚོན་པ་ཡིན་ནོ། །དབུས་ཆོས་འཁོར་གྱི་ལྟེ་བས་བསླབ་པ་གསུམ་གྱི་ནང་ནས་ཚུལ་ཁྲིམས་ཀྱི་བསླབ་པ་མཚོན་པ་དང༌། བར་གྱི་རྩིབས་བརྒྱད་པོས་ཤེས་རབ་ཀྱི་བསླབ་པ་མཚོན། མཐའི་མུ་ཁྱུད་ཀྱིས་ཏིང་ངེ་འཛིན་གྱི་བསླབ་པ་མཚོན་པ་ཡིན། རི་དྭགས་ཕོ་མོ་གཉིས་ཀྱིས་ཐབས་དང་ཤེས་རབ་མཚོན་ཏེ་ཐབས་ཤེས་ཟུང་འབྲེལ་གྱི་ལམ་ལ་བརྟེན་ནས་སངས་རྒྱས་ཀྱི་གོ་འཕང་ཐོབ་པ་མཚོན་པ་ཡིན་ནོ། །