སྐུ་གསུང་ཐུགས་དང་ཡོན་ཏན་འཕྲིན་ལས་ཀྱི། །
ཁ་འབབ་རྣམ་བཞིའི་ཟད་མེད་བདུད་རྩིའི་རྒྱུན། །
ལུས་ཅན་ཡིད་ལ་རེག་པའི་མཛད་བཟང་གིས། །
འགྲོ་ཀུན་སྐྱོང་བའི་རྒྱལ་རྣམས་དགོངས་སུ་གསོལ། །
ཁ་བའི་རྡུལ་མང་མང་དུ་སྤུངས་པའི་རབ་མཛེས་མཛེས་ལྗོངས་ལྟ་ན་སྡུག །
རྒྱལ་ཀུན་སྙིང་རྗེ་རྗེ་འབངས་དུ་མའི་རྣམ་སྤྲུལ་སྤྲུལ་སྐུ་མཚར་དུ་མངར། །
གྲུ་འཛིན་ཞིང་མཆོག་མཆོག་གི་དངོས་གྲུབ་གྲུབ་པས་ས་ལ་བསྙིལ་འདྲ་བ། །
ཆོས་སྲིད་ལུགས་གཉིས་གཉིས་གའི་མངའ་བདག་བདག་ཉིད་ཆེ་དེས་ཤིས་པ་སྩོལ། །
༄༅། །མཁས་ཤིང་གྲུབ་པའི་དབང་ཕྱུག་༧སྐྱབས་རྗེ་ཆོས་ལྡན་རིན་པོ་ཆེའི་མྱུར་འབྱོན་གསོལ་འདེབས་དད་པའི་དབྱངས་སྙན་ཞེས་བྱ་བ་བཞུགས་སོ། །
སྟོན་པ་ཟླ༵་མེ༵ད་ཐུབ་པའི་དབང་པོ་དང་། །
བསྟན་པ་ཟླ༵་མེ༵ད་ལུང་རྟོགས་དམ་པའི་ཆོས། །
བསྟན་འཛིན་ཟླ༵་མེ༵ད་ཤིང་རྟ་ཆེ་གཉིས་དང་། །
འཇམ་མགོན་བླ་མས་དེང་འདིར་བྱིན་ཆེན་ཕོབས། །