༄༅། །གང་བློ་མཁྱེན་པའི་ལྷ་ལམ་ཡངས་པར་བརྩེ་ཆེན་བཟང་པོའི་སྤྲིན་འཁྲིགས་ནས། །
རྒྱལ་བསྟན་འཛིན་མར་མཛེས་པ་སྐྱེད་བྱེད་འཇིགས་མེད་རྡུལ་བྲལ་སྤོབས་པའི་ཆར། །
རྟག་ཏུ་འབེབས་མཁས་དབང་ཕྱུག་བརྒྱད་ལྡན་མཁས་མཆོག་ཀུན་གྱི་མགོ་བོ་ལ། །
ངལ་གསོ་མཛད་པའི་སྙིགས་དུས་བཤེས་གཅིག་ཁྱོད་ལ་རྣམ་ཀུན་ཕྱག་བགྱི་འོ། །
ཚེ་སྔོན་བསགས་པའི་ལས་བཟང་འབྲས་བུས། །
ཚེ་འདིར་མགོན་ཁྱེད་མཇལ་སྐལ་རྙེད་པ། །
ཚེ་འདིའི་མི་རྟག་རང་བཞིན་སྟོན་ཆེད། །
སྐྱབས་གནས་བླ་མ་དག་ཞིང་ཕེབས་སོང་། །
༄༅། །བསྟན་པའི་བདག་པོ་སྟོན་པ་ཤཱཀྱ་ཐུབ། །
ཀླུ་སྒྲུབ་ཐོགས་མེད་པཎ་གྲུབ་བཅུ་བདུན་དང་། །
འཇམ་དགོན་བླ་མ་རྗེ་བཙུན་ཆོས་རྒྱན་སོགས། །
དྲིན་ཆེན་བླ་མའི་ཚོགས་རྣམས་སྙིང་ནས་འདུད། །